Ein kvar kommunesamanslåing inneber at ein tar stilling til namnespørsmålet. Stadnamn er ein særs viktig miljøfaktor og tett knytt opp mot identitet. Identitet og tilhøyrsle må kunne sjåast som grunnleggjande menneskelege verdiar ut frå mennesket sitt behov for å leva i ein historisk samanheng. Stadnamn er skapt i fellesskap og høyrar fellesskapet til. Dei fortel noko om tilhøva på staden, og har evne til å bere lokal historie i eit lengre perspektiv. Språkrådet definerer stadnamn som språklege kulturminne som må vernast om, og såleis er det oppretta ei lov om stadnamn; Stadnamnlova av 01.07.1991. Kommunane sjølve vel kommunenamn. Kommunenamna vert såleis ikkje fastsette ifylgje reglane i stadnamnlova, men Språkrådet som statens fagorgan i spørsmål som omhandlar språk vil kunne gje råd i desse sakane. Det er ikkje vanskeleg å skjøna at val av stadnamn ofte kan verte opphav til frustrasjon for dei involverte. Språkrådet oppmodar difor til å starte namnedebatten tidleg då ein namnestrid kan velte samanslåinga.
I Fellesnemnda i Alversund kommune vart det den 9. oktober 1962 halde fellesmøte kring namnespørsmålet i samband med kommunesamanslåinga. Nokre viktige prinsipp som det generelt må takast stilling til når ein skal velja eit passande namn kan til dømes vera at namnet må vera dekkjande for heile eller store delar av området det skal skildre for at dei fleste av innbyggjarane skal kunne identifisera seg med det valde namnet. I nokre tilfelle vil det koma føreslag om eit namn som har vore brukt om eit større område i kommunen, men då kan namnet òg omfatta område som ikkje høyrar inn under det området ein skal skildra, og slik verta for vidt i omfang.
På fellesmøtet i Knarvik vart det halde fleire røystingar før ein kunne samla seg i tilråding om eit namn. Fylkesmannen minte om at dersom eit fleirtal på minst ¾, i dette tilfellet 40 representantar, kunne bli einige burde det ikkje verte naudsynt at Kongen utan serleg viktige grunnar avvika frå fleirtalet si tilråding. I første runde sat ein med namna Lindåshalvøy (19 røystar), Alversund (15 røystar), Nordhorda (9 røystar), Nordhordland (2 røystar), Alvås, Seim (1 røyst) og Lindås (1 røyst). Med eit slikt resultat heldt fylkesmannen fram at Kongen ville stå heller fritt i sin avgjer.
Fylkesmannen spurde om ein kunne verte samde om stadnamnet Seim då dette kunne sjåast som eit historisk og nøytralt namn som kunne vera samlande. Namnet kjem av norrønt Sæheimr, av sær som tydar «sjø». Seim var tidligare ein kongsgard i Alversund i Lindås kommune, og ligg rett ved Seimsfjorden. Namnet har såleis eit beskrivande uttrykk ved å karakterisera tilhøva på staden.
Fylkesmannen såg namna Nordhordland og Norhorda som namn som dekte eit for stort område. Lindåshalvøya meinte han vart eit for tungt namn som difor ville få same lagnad som namnet Bømmeløy hadde fått. Namnet Alversund ville ein vanskeleg kunne einast om då dette allereie var i bruk som kommunenamn på eit mindre område som ikkje ville vera representativt for storparten av den nye kommunen sine innbyggjarar. Alvås var eit kunstig namn, og ville såleis ikkje vere likt av staten sine namnekonsulentar. Språkrådet rår til å bruka eit av dei eksisterande kommunenamna vidare. Alvås kan sjølvsagd sjåast som eit nøytralt namneval då det omfattar begge kommunane sine namn, men dette valet ville ikkje vera i tråd med ivaretakinga av historiske namn då både Lindås og Alversund ville gå tapt som kommunenamn. Namnet Lindås eller Lindaas (eldre skrivemåte) var opphavleg eit norsk gardsnamn. Sistedelen av namnet tydar sjølvsagd «ås», men lind kan tydast på to måtar; namnet kan ha samanheng med at det veks mykje lind i området, men kan òg fortelje noko om forma på åsen, til dømes at den er forma som eit band (norr. lindi) eller at den er svakt skrånande (av adjektivet linn som tydar «mild» eller «svak»). Når det gjeld namnet Alversund kjem fyrste del av namnet truleg frå norrønt al som tydar «hel» og viðra som tydar «vêr»; ein stad der ein kan oppleva all slags vêr. Siste delen av namnet, «sund» kjem truleg frå sundet som skil Alversund frå Radøy. Me kan atter ein gong sjå korleis naturområda påverkar valet av stadnamna.
Ved neste prøverøysting i Fellesnemnda var det stor semje i kommunestyret kring namnet Lindås, då fleirtalet hadde forkasta namnet Lindåshalvøya. Ordførar Åsgard ville ta opp framlegg om namnet Lindås som var eit gamalt kommunenamn og namn på den største kommune i området. Både den nye prøverøystinga og den endelege røystinga viste fleirtal for dette alternativet. Den endelege røystinga skulle gje 23 røyster til Lindås, 15 til Alversund, 12 til Norhorda og 3 til Seim. Det nye kommunenamnet vart slik Lindås.
